الأحد، 9 مايو 2010

الذكاء الصناعى

نظر لي صديقى نظرة تذكرنى باينشتاين- عندما قال " الغباء البشرى ليس له حدود" - وكان شعره مشعث مثل شحاتين السيدة وقال لي بجنون
" الكومبيوتر بتاعى بيكرهنى"
قلت له بهدوء وبرود ربما لأستفزه
- اهدا يبنى واحكيلى الحكاية من الأول

منذ قديييييييييييييييم الأزل
"لا مش زمان قوى كدة"

قال أبو ماجد
"يلا يا ماجد يا حبيبي بمناسبة نجاحك جبتلك كمبيوتر جديد من بتوع الذكاء الصناعى "

"يا ابن المحظوظة"

"متقاطعنيش وانا بحكى "
"طيب كمل"
منذ قديييـ
"لا انت هتحكى من الاول ولا ايه؟ .. لخص"
"المهم بابا جابلى بمناسبة نجاحى فى الثانوية بمجموع 50% جهاز كمبيوترجديد مزود بالذكاء الصناعى و تكلمه و يكلمك
طبعا انا فرحت بيه جدا اخيرا حاجة اتمنظر بيها عليكم يا أوغاد
وكانت البداية أن الجهاز رفض أنى أصطبله ويندوز 98 وقالى ان مقامه ميسمحلوش بأقل من ويندوز فيستا أو ويندوز 7"
"يا نهار أرقام ! وأنت عملت ايه "
"وفضلت أحايله ميردش أقوله يا سيدى ميردش و فى الأخر بعد ما كنت هبوس كيبورده وافق أنى أصطبله الويندوز ال98 "
"طب الحمد لله المشكلة اتحلت"
" لا ما انا لسه هكملك بعد كدة جيت أشغل فيلم رعب الجهاز رفض لأنه بيخاف من أفلام الرعب و لقيته راح مشغل مسلسل بكار "
"تصدق الجهاز دا بيفهم " مش عارف ليه مصمم أستفزه
قال لي ماجد بغضب
" يا جدع سيبنى أكمل للأخر, والجهاز فضل مشغل بكار وكل ما تعجبه حتة يفضل يعيدها ويضحك عليها فقلت بلاش أفلام وقلتله شغل الشات "
" اه أحسن عشان تفك عن نفسك "
"فتحت الشات لقيت واحدة مكتوب أن عندها 22 سنة فرحت وكلمتها وكتبت انا اسمى رامي عندى 25 سنة وشغال مهندس و ساكن فى الزمالك لقيت الجهاز مغير الكلام وقال انا عيل عندى 17 سنة و ساكن فى القللى و أصحابي بيقولولى يا كابتن ماجد"
فانفجرت فى الضحك ثم بعد ذلك قلت له فى استغراب
"والجهاز عرف منين أننا بنقولك يا كابتن ماجد"
فقال لي بغيظ
"يا عم هو دا بس اللى انت مستغربله "
فقلت له "طب أجيبلك ايه عشان تروق أعصابك "
فقال لى "هاتلى واحد ليمون"
فقلت للواد بلية صبى القهوة - صبي ميكانيكي سابقا بس ربنا تاب عليه من الشغلانة دى بعد ما المعلم ضربه بمفتاح فى دماغه طيرله الذاكرة - "واد يا بلية اتنين ليمون هنا على حساب كابتن ماجد"
فقال لي بغيظ أكبر- فلا أعتقد أن الليمون سيساعد على تهدئة أعصابه - " ممكن أكمل"
فقلت له " طب كمل دلوقتى"
فقال لي " احنا وقفنا فين ؟ اه عند الشات طبعا انا اتضايقت مه وقلتله انت غبى ايه اللى انت عملته ده ؟ فجأة لقيت الشاشة سودة والجهاز بيقولى طب وحياة جدك اللى مات من الجوع منا شغال عشان تحرم تغلط تانى"
طبعا انا خفت ميشتغلش تانى فقلتله خلاص يا بوب انا بهزر معاك و معلش و هو رافض والبروسيسور بينقح عليه ففضلت اتحايل عليه تانى عشان يشتغل ووافق بعد ما وعدته انى اجيبله رامة زيادة"
هنا قاطعنا بلية- صبى القهوة اللى كان صبى ميكانيكى - وهو يقول " اتفضلو الشاي " لسه هقوله احنا طالبين ليمون لقيت واحد بيزعق بعيد وبيقول " انا طالب شاي مين جابلى الليمون ده"
فقدرت أن ذاكرة بلية دلوقتى مش ولا بد فقلت أشرب الشاي وأمرى لله ثم قلت لماجد " اشرب الشاي ده على حسابي عشان انت صعبت عليا و كمل حكايتك "
فقال لي ماجد " و أخيرا اشتغل قلت لنفسى تعمل ايه يا واد يا ماجد و فى الأخر قلتله طب ممكن تشغل لعبة فقالى ممكن و بعد كدة لقيته مشغل سوبر ماريو وفضل يلعب مع نفسه و انا خايف أزعله و فى الأخر لما جاله جيم أوفر راح اتنرفز وقال انا غلطان انى اشتغلت "
" يا حول العالم ! ليه كدة"
"المهم طبعا انا كنت زهقت منه بس مرضيتش اضايقه أكتر فقلتله طب ادينى محاولة يمكن أعرف أعدى فوافق وشغلى اللعبة"
فقلت وانا أشرب الشاي - بالمناسبة انا مش بحب الشاي - "طب الحمد لله عرفت تلعب ؟ أخيرا"
فقال و هو يكاد يبكى من الغيظ " مهو المشكلة انه خلانى ألعب بالوحش لانه عايز يموت ماريو كنوع من الانتقام و كل شوية يزعق ويقولى دوس اكس دوس اكس "
" طب وفيها ايه ما تدوس اكس "
قالى لي بغضب" مهو مفيش زرار اكس فى الكيبورد"
هنا جاء بلية وقال لي " الحساب 4 جنيه"
قلتله باستغراب"ليه كدة يا بلية"
فقال لي بذكاء "حساب اتنين سحلب"
وبعد ان دفعت حساب السحلب وانا اشرب الشاي قلت لماجد "كمل يا عم دا انت موالك موال "
فأكمل و هو حافة الانهيار العصبي "حاولت اعمل اى حاجة على الجهاز فى الأخر زهقت أصلا من سوبر ماريو لانى لعبتها ألف مرة قبل كدة فجاتلى فكرة جهنمية قلت للجهاز ايه رأيك تلاعبنى ماتش فيفا؟ الحمد لله الفكرة عجبته وشغل ماتش و لعب هو بالأهلى و انا بمركز شباب الحبانية وطبعا مرضيتش اعترض على الاختيار و بدأ الماتش"
"الحمد لله"
" خمسة صفر "
" لا حول ولا قوة الا بالله"
" زى ما بقولك كدة فانا قلت فرق خمسة من قبل ما الماتش يبدأ ظلم بس مرضيتش أتكلم انا مصدقت لقيت حاجة عدلة اعملها على الجهاز و فضلنا نلعب بس كل شوية اللعيبة بتاعته ترمى نفسها على الأرض والحكم يحسبله فاول"
" دا ايه الظلم ده! وبعدين؟"
"مفيش كسبنى 329 - صفر"
فقلت وانا أضرب كف بكف "ايه الكمبيوتر العجيب ده انا لو منك أكسره"
فقال ماجد
" مهو انا بقى اتعصبت و مسكت مقشه و فضلت أضرب فى الجهاز لحد ما كسرته خالص"
فقلتله " يعنى انت زعلان دلوقتى عشان الجهاز الجديد اتكسر"
فقال لي " لا دا بابا دخل لقانى بكسر فى الجهاز طردنى من البيت وانا جايلك النهاردة أبات عندك الليلة دى"
فنظرت له بغيظ ثم قلت " ابقى هات معاك ساندوتشاتك عشان مفيش عشا"

هناك 11 تعليقًا:

  1. جميلة يا أحمد..و مضحكة فعلا..
    حاول التقليل من العامية المرة القادمة ان شاء الله
    تحياتي
    علاء

    ردحذف
  2. حلوة يا أحمد ..، انت بعتهالي من فترة ..
    أفكارك حميلة جداً

    ردحذف
  3. تحفة يا احمد

    ماشاء الله اديب واعد

    ردحذف
  4. جااااااااااااااااااااااااامد جدا يامعلم

    ردحذف
  5. جامدة با احمد بجد , ان شاء الله ليك مستقبل
    عايزك تملى البلوج دى P:

    ردحذف
  6. فزيييعة يا ماجيكو بجد ض2
    مستفز مستفز يعني XD

    كيب إت أب =)

    ردحذف
  7. موزهلة يا ماشيكوه
    بيجد حولوه أوي موت طحن أخر حاجه ضض7ي ح ل ا و ه
    مستنيين ال آدد الجديد
    بليز أي نيد هامبورجر >#_~<

    ردحذف
  8. بجد يا احمد تفوقت على نفسك فيها ، العاميةجميلة ومبسطة وأسلوب سردك جميل جداً والقفشات جميلة جداً، لو هتكتب فصحى يبقى فصحى بس صرف يعنى ،،
    متابعك بقوة..
    شمس الدين

    ردحذف
  9. تسلم ايديك وأفكارك يازعيم ....بجد عجبتني جداً ...وانا مش من السهل أقرا اي حاجه للاخر على النت ..بس ده حصل معاك :)

    ردحذف
  10. ما شاء الله أنا قريت بلوجات كتير
    بس دي عجبتني فعلا و متابع معاك بس ياريت مايقلش عدد الاضافات عن اضافه كل أسبوع ..

    ردحذف
  11. ربي يسعدك ، تخيلت لو ان الكمبيوتر كمبيوتر ، كان كسرته من البدايه ..

    استمر

    ردحذف